Ana del Val Kultura eta Kirol Saileko foru diputatuak azaldu du duela hilabete batzuk Arabako Foru Aldundiak Amarika Aretoa berrikuntza zentro baterako espazio egokia izan zitekeela pentsatu zuela, bai kokapenagatik, bai espazioaren ezaugarriengatik, baina, beti bezala, sailak etengabeko komunikazioa izan du kultura sektore osoarekin, eta, hari entzun ondoren, erabaki du Amarika Aretoak kulturgunea izaten jarraitzea.

"Kultura Sailean beti entzun diogu modu aktiboan eta etengabe Arabako kultura sektoreari. Sarritan bildu gara kulturarekin lotutako artistekin eta profesionalekin, gure nahia Arabako kultura arloko beharrei erantzutea baita.Entzute horretatik sortu zen Kultura Plana, eta, entzute aktibo horren ondorioz, beharrezkotzat jotzen da Amarika Aretoak kulturgunea izaten jarraitzea", baieztatu du Ana del Valek.

Alabaina, foru diputatuak adierazi du Amarika Aretoko proiektua hobetu egin behar dela etorkizunari begira. "Aretorako alternatiba bat edo hura biziberritzeko proiektu bat behar dugu oraindik ere, eta Kultura Planean helduko diogu gai horri".

"Eragile kulturalen, espazioen eta publikoen artean sinergiak sortzen dituzten aukerak sortzearekin, koordinazioarekin eta parte hartzearekin konprometituta jarraitzen dugu, eta, gauzak egiteko gure modua izan denez beti, tematuta gaude etengabeko elkarrizketa horri eusten, gure lurraldeko kulturarako proiekturik onena lortzeko", esan du amaitzeko Ana del Valek.