Arriaga Antzokiak, berriz ere, ikuskizun musikal handi bat eskainiko du uda honetan. Abuztuaren 14tik, ostegunetik, irailaren 21era, igandera, Mamma Mia! izango dugu Bilbon, Suediako ABBA talde ahaztezinaren musika duen musikal handia. Ikuskizun zirraragarri eta hunkigarri hau ez da Bilbora izenburu berberarekin beste batzuetan etorri dena, beste muntaketa bat da, eta bost aste pasatxo izango da ikusgai Arriaga Antzokian, Aste Nagusia barne hartuta.
Mamma Mia! musikalaren ekoizpen berriak eszenografia, jantzi eta koreografia originalak ditu, baita letra eta moldaketa musikal berrituak ere. Musikalak 800.000 ikusle baino gehiago utzi ditu liluratuta Madrilgo Gran Vían arrakasta handia izan duten hiru denboralditan, non egun bakoitza zinezko festa bat den. Ikuskizuna ABBAren 23 abesti arrakastatsuenetan oinarritua dago eta hortaz "Dancing Queen", "Gimme Gimme Gimme", "Chiquitita", "The Winner Takes It All", "Voulez Vous", "S.O.S", "Super Trouper" edo "Thank you for the music" entzun ahalko dira, besteak beste. Horrela, Mamma Mia! komedia musikalean, inork ezin dio eutsi abesteko, dantzatzeko eta hunkitzeko bulkadari. Horrez gain, musikalak kontatzen duen istorioa amei eta alabei, maitasunari eta lagun zaharrei egindako omenaldi bat da. Hori dela eta, musikala adin eta publiko mota guztientzat da aproposa, bikotekidearekin, lagunekin edo senideekin gozatzeko modukoa.
Ikuskizun hau ATG Entertainment-en produkzio bat da, SOM Produce barne hartu duen taldea. SOM Arriaga Antzokian arrakasta izan duten beste musikal batzuez arduratu da, hala nola Priscilla Reina del Desierto, West Side Story eta Chicagoz. Proposamenaren kalitateari eta publikoaren konfiantzari esker, Antzerki Musikalaren Sarietan Koreografia Onenaren saria jaso du, besteak beste.
SINOPSIA
Donna ama ezkongabe eta independente bat da, zeinak hotel txiki bat baitu Greziako uharte idiliko batean. Bakarrik hezi du bere alaba Sophie, zeina laster ezkontzekoa baita. Inork jakin gabe, Sophiek amaren egunerokoa irakurtzen du eta hiru maitalerekin topo egiten du: hiru aita posible! Ziurgabetasun horrekin amaitzeko, hiruak ezkontzara gonbidatzea erabaki du. Kaosa bermatuta dago Donnaren aspaldiko lagun onenak agertzen direnean. Berriz elkartzen direnean, bai barrea, bai zirrara eragingo digute, maila berean. Oholtza gainean, Donnak, Taniak, Rossiek, Sophiek, Skyk, "hiru aita posibleek" eta antzeztaldeko 27 kideek musikal batean inoiz azaldu den istorio dibertigarriena eta maitagarriena kontatuko digute.
EGUNDOKO MUSIKALA
Londresen estreinatu zenetik 25 urte igaro diren arren, Mamma Mia! antzerkian inoiz ikusi den fenomeno handienetako bat da oraindik ere. 15 hizkuntza baino gehiagotara itzuli da eta 70 milioi ikusle baino gehiagok txalotu dute mundu osoan. Zinemara ere eraman zuten, eta filmaren arrakasta egundokoa izan zen. Espainiar Estatuan ere arrakasta handia izan du musikalak, 2004an estreinatu zenetik, eta 20 urte daramatza hiru produkzio desberdinekin arrakasta izaten. Orain, Mamma Mia!ren produkzio berri honi esker, Bilbo Greziako uharte idilikora joango da berriro ere, urteko ezkontzara joateko, pertsonaiekin maitemintzeko eta euren energia positiboarekin kutsatzeko. Uda honetan, Arriaga Antzokia festa zoragarri baten epizentro bihurtuko da.
SARRERAK SALGAI ARRATSALDE HONETAN BERTAN
Sarrerak gaur jarriko dira salgai, martxoaren 26an, asteazkenean, 17:00etan, ohiko salmentarako kanalen bidez: www.teatroarriaga.eus webgunean edo antzokiko txarteldegietan, aldez aurreko salmenta ordutegian. Musikal honetarako finkatutako prezioak 30 eta 69 euro bitartekoak dira, eta hainbat aukera daude, egunaren eta deskontuen arabera.
MAMMA MIA! EL MUSICAL
Musika eta letrak: BENNY ANDERSSON & BJÖRN ULVAEUS
STIG ANDERSONEN LANKIDETZAREKIN
JATORRIZKO LIBRETOA: CATHERINE JOHNSON JUDY CRAYMERen IDEIA BATEAN OINARRITUTA
ARRIAGA ANTZOKIA - EMANALDIEN EGUTEGIA
ABUZTUA
IRAILA
