Maiatza eta iraila bitartean, Azkuna Zentroa – Alhóndiga Bilbaok Chiharu Shiota artistaren "My House is your House" erakusketa aurkeztuko du. Chiharu Shiota munduko arte garaikideko artistarik nabarmenetako bat da, eta, bere herrialdetik kanpo bizi izanda, Veneziako Bienalean Japoniaren ordezkaria izan den lehen artista japoniarra da.
Ana Mendietaren eta 1970eko hamarkadaren hasierako artista feministen belaunaldi oso baten oinordekoa da Chiharu Shiota. Bere gorputzarekin lan egiten du, esku hartzeko espazio gisa hartuta, lurrarekiko, iraganarekiko eta memoriarekiko lotura jorratzen duten performanceak eginez.
Artilez ehundutako instalazioengatik da ezaguna. Bere bilbadurek erakarpen onirikoa sortzen dute, eta, aldi berean, memoria, forma filosofiko baten existentzia eta haren absentzia berpizten dute.
Azkuna Zentroan bere artea erakusteko sortutako site specific honek Bilbo du inspirazio-iturri, eta Alhóndigako arkitekturarekin ari da solasean. Tereza de Arruda historialariak komisariatutako erakusketa honetan, gorriak eta eskala handiko sorkuntza-lanak Ataria eta Erakusketa Aretoa lotzen dituzte, ibilbide bat eginez bere obratik, hasierako lanetatik inoiz erakutsi gabeko instalazioetaraino.
CHIHARU SHIOTA
Chiharu Shiota pinturan (Kiotoko Seika Unibertsitatea, 1992-1996) eta arte bisualetan (Braunschweigeko Goi Mailako Arte Eskola, 1997-1999 / Berlingo Arte Akademia, 1999-2003) trebatuta dago, eta Berlinen bizi da.
Erakusketa hauek egin ditu, besteak beste: Hammer Museum, Los Angeles, Queensland Art Gallery of Modern Art (QAGoMA), Brisbane; ZKM | Zentrum für Kunst und Medien, Karlsruhe; Zeelanda Berriko Te Papa Tongarewa Museoa, Wellington; Mori Arte Museoa, Tokio; Gropius Bau, Berlin; Australiako Hegoaldeko Arte Galeria; Yorkshire Sculpture Park, Erresuma Batua; Kochiko Arte Museoa; eta Osakako Arte Museo Nazionala. 2025eko lehen hiruhilekoan, Parisko Grand Palais-en erakutsi ditu bere artelanak.
Nazioarteko erakusketa askotan ere parte hartu du, hala nola Oku-Notoko Nazioarteko Arte Jaialdian, Sydneyko Bienalean, Echigo-Tsumariko Arte Hirurtekoan eta Yokohamako Hirurtekoan. 2015ean, Shiota hautatu zuten Japonia ordezkatzeko Veneziako Bienalaren 56. edizioan.
