Gizakunde elizak Bilboko Udalak antolatutako BAS, Bilbao Arte Sakro Jaialdia, hartuko du apirilaren 10etik 14ra. ‘Mirespena / Admiración’ izenburupean, Bach, Carissimi, Palestrina edo Zubiaurre konpositoreen musika entzungo da. Emanaldi guztiak 19:30ean izango dira.
Aurtengo edizioko sarreren salmenta apirilaren 1ean, asteartea, hasiko da eta 10 eurotan egongo dira salgai Arriaga Antzokiko leihatiletan, www.teatroarriaga.eus eta musika-musica.bilbao.eus webguneetan, baita elizan ere, kontzertu bakoitza baino 30 minutu lehenago.
BAS, BILBAO ARTE SAKRO, 2025 JAIALDIAREN PROGRAMAZIOA
Ostegunean, apirilaren 10ean, La Ritiratak "Maitasun mistikoa" interpretatuko du, Durón, Torres, Hidalgo, Cabanilles edo Sances bezalako Barrokoko konpositore espainiar eta italiarren musika errepertorioa. Taldeak Santa Teresa de Jesus, San Juan de la Cruz, María de Zayas eta Lope de Vegaren poesia mistikoarekin bateratuko du. Josetxu Obregonek zuzendutako kontzertuan Beatriz Oleaga mezzosopranoa eta Manuela Velasco aktorea izango dira.
Hurrengo egunean, apirilaren 11an, ostirala, Palestrinaren jaiotzaren 500. urteurrena ospatzen den urtean, The Tallis Scholars britainiar taldeak gutxi ezagutzen den meza bat eta konpositorearen moteterik onenetako bat interpretatuko ditu. Halaber, errepertorioari Orlandus Lassusen zenbait obra gehituko dizkiote. Peter Phillipsen gidaritzapean, besteak beste, "Missa Ut re mi fa sol la", "Laudate pueri dominum", "Media vita", "Tribulationes civitatum", "Timor et tremor" eta "Tu es Petrus" entzungo dira.
Bestalde, apirilaren 12an, larunbata, London Handel Playersek Bachen kantata erlijiosoei eskainiko die bere programa, Barroko berantiarraren adierazle nagusia. Saio honetan Jessica Cale sopranoa, Mercé Bruguera Abelló mezzosopranoa, Benedict Munden tenorra eta Tristan Hambleton baxua entzungo dira.
Apirilaren 13an, Bilboko Koral Elkarteak "Valentín María de Zubiaurre (1837 – 1914) – Durangoko San Antonio komenturako musika" proiektua aurkeztuko du lehen aldiz —komentuko hormen artean ehun urte baino gehiago igaro ondoren—, musikari bizkaitarrak komentuko komunitatearentzat konposatu zuen lan argitaragabeari balioa emanez. Musika tradizio aberatsa duen corpusa da, eta agerian uzten du Zubiaurrek jaioterriarekiko eta liturgiarekiko sentitu zuen atxikimendua. Hala, programak latinez, euskaraz eta gaztelaniaz idatzitako obrak biltzen ditu.
Azkenik, apirilaren 14an, astelehena, Alejandro Mariasek zuzendutako La Spagna taldeak "Lamenti di donna" kontzertuarekin emango dio amaiera 2025eko BAS edizioari. Errepertorio horretan, rol eta egoera desberdinak dituzten sei emakume —maitale irrikaria, maitale traizionatua, erregina kondenatua, dontzeila jazarria, printzesa abandonatua eta ama kanibala— ikusiko dira malenkoniaren, traizioaren, bidegabekeriaren, lizunkeriaren, abandonuaren eta damuaren aurrean.
SARREREN SALMENTA
Sarrerak 10 euroko prezioan erosi ahal izango dira apirilaren 1etik aurrera.
