Sudango gerrak egungo krisi humanitario handienetako bat eragin du: milioika lagunek etxetik ihes egin behar izan dute Sudango Indar Armatuetako eta Laguntza Azkarreko Indarrak talde paramilitarreko jeneralek elkarri gerra deklaratu ziotenetik, 2023ko apiriletik alegia, boterea banatzeko orduan ados jarri ez zirelako. Herritarren 2018ko iraultzarekin abiarazitako prozesu demokratizatzailea amildu egin zen, beraz. Milaka lagun erail dituzte, eta bizirik dirautenek hastear dagoen goseteari aurre egin behar diote. Besteak beste, Arabiar Emirerri Batuak, Errusia, Egipto, Libia, Ukraina eta Israel gatazkan sartu dira beren interes geopolitiko eta ekonomikoen atzetik: litio- eta uranio-erreserba handiak izateaz gain, Sudan Afrikako hirugarren urre-ekoizlea ere bada.
Erakusketa honetan, ahazturiko bi gatazkak (eta oro har gerrak) biztanleria zibilean dituzten ondorioak ikusten dira, parte hartzen duten potentzien interesen biktima da-eta jendea.
Ricardo García Vilanova (Bartzelona, 1971) freelance argazkilari eta bideografoak 25 urtetik gorako esperientzia du gatazka eremuetan eta giza krisialdietan, batez ere Afrikan, Ekialde Ertainean eta Europan. Arabiar Udaberrien berri eman du 2011tik Sirian, Libian eta Iraken oinarrituta. Azken urteotan, Ukrainako gerra, Sahel eta Baxar al-Assad agintetik bota ondoren Siriako egoeraren berri eman du.
Bere argazkiak, besteak beste, komunikabide hauetan argitaratu dituzte: Life, Newsweek, Time, The New York Times, The Washington Post, The Wall Street Journal, The New Yorker, Le Monde, Liberation, Paris Match, The Guardian, The Times, Die Welt, Der Spiegel eta Stern. Gainera, hainbat erakunderekin elkarlanean aritu da: Nazio Batuak, Gurutze Gorriaren Nazioarteko Batzordea, Mugarik Gabeko Medikuak eta Human Rights Watch. Freelance bideo-kazetari gisa, CNN, BBC, France 24, Al Jazeera, Channel 4, VICE, PBS eta Euronews komunikabideekin egin du lan besteak beste.
The Wall Street Journal egunkariak bere hautagaitza aurkeztu zuen 2010eko Pulitzer sarirako eta hainbat erakundek saritu izan dute: World Press Photo, Pictures of the Year (POY), NPPA, International Photography Awards (IPA), PX3, Bayeux Calvados-Normandy Award, Moscow International Foto Awards, Lens Culture, Days Japan International, Mika Yamamoto International Journalist Award eta International Press Club. Bideografo gisa, Rory Peck saria eta bi Emmy sari eskuratu ditu CNNko taldearekin.
Artistak: Ricardo García Vilanova
Fokuan programako aurtengo erakusketaren inaugurazioa apirilaren 7an izango da, 11:00etan, eta Ricardo Garcia Vilanova egilea bertan izango da, bisita gidatua egiten.
