Apirilaren 5ean, larunbata, Galdakao Euskal Herriko dantza urbanoen erakusleiho izango da, Torrezabal Kultur Etxean egingo den GaldakaoDantz jaialdia dela eta. Ekitaldi paregabea da eta galdakoztar dantzazaleen artean oso estimatua, urtero lurraldeko dantzarien sormen eta talentuaz gozatzeko aukera ematen baitie. Artistek, bestalde, beren trebetasunak erakusteko, urrats berriak ikasteko eta euren dantzarako grina partekatzeko aukera izango dute.

Izan ere, jaialdiak Euskal Herriko dantza talde onenen koreografiak eta hiriko dantza estilo anitzak ikusgai jarriko ditu. Lehiaketa formatua duen ekitaldi honek bi kategoria izango ditu: junior kategoria (15 urtetik beherakoen dantza koreografiak) eta kategoria absolutua (16 urtetik gorakoenak). Kategoria bakoitzeko talde irabazleek, diruz saritzeaz gain, maiatzaren 17an Barakaldon egingo den BreakOnStage jaialdian parte hartzeko aukera izango dute.

Jaialdia bi pasetan banatuko da: 16:00etan junior kategoria eta 19:00etan kategoria absolutua. Sarrerak dagoeneko jarri dira salgai Udalaren webgunean eta Torrezabal Kultur Etxeko leihatilan, 5 euroren truke.