Hitzaldi honek, "Grekotik Zuloagara. Espainiako artearen maisulanak Arte Ederren Bilboko Museoan" erakusketa inauguratzen duenak, erakusketan dauden artelanen aukeraketa aztertzen du, eta museoaren bilduma XX. mendean zehar gaur egun arte nola osatu den ondo erakusten du.
José Luis Merinok, Museoko Antzinako Artearen Kontserbatzaileak, erakusketa honetako margolan eta eskulan adierazgarrien sorta bat aztertzen du, besteak beste, Grekoaren Deikundea, Luis Pareten Bermeoko bista, Goyaren Martín Zapaterren erretratua eta Juan de Anchietaren Kalbarioa. Aldi berean, hitzaldiak erakundearen esentzia bera ere laburbildu nahi du. Izan ere, erakusketako lan bakoitza mugarri bat da erakundearen eraketaren kontakizunean.
1913an bilduman sartu zen lehen lana museoa bera sortu zen une berekoa da. Ama Birjina Haurrarekin eta Santiago Nagusiarekin da, 1786an Luis Paretek eta Alcázarrek margotua Bilboko Udalaren enkarguz. Ia aldi berean, urtebete geroago, erakusketa honetako lanik modernoena gehitu zen: Rosita Gutiérrez andrea, 1914 eta 1915 bitartean Ignacio Zuloagak margotua. 1919 eta 1926 bitartean, erakusketa honetan aurkezten diren hainbat lan erosi ziren funts propioekin: Francisco de Zurbaránen Alexandriako Santa Katalina eta Santa Isabel Turingiakoa, Francisco Herrera Zaharraren Senitarte Santua, Grekoaren Deikundea eta Juan Ribaltaren Artzainen adorazioa.
Ondorengo hamarkadak eskuratze politika batek markatu zituen, eta politika hori, aldi berean, dohaintzen eta legatuen historia garrantzitsu batek nabarmendu zuen. Antonio Plasencia Bohígasek, Ramón de la Sota y Aburtok, Mercedes Basabek, Josefina Otaduyk edo, berriki, Begoña María de Azkuek pinakoteka honen antzinako artearen bilduma garrantzitsua elikatu eta eraikitzea ahalbidetu zuten.
