Hurrengo martxoaren 30ean, 12:00etatik aurrera, Bilboko Udal Musika Bandak “Musika eta humanismoa” izeneko kontzertua eskainiko du Euskalduna Jauregiko Auditoriumean, arteak gizateriaren bilakaeran duen papera hausnartzera gonbidatzen duen emanaldia.

José R. Pascual-Vilaplana zuzendari titularraren gidaritzapean, taldeak omenaldia egingo die musika humanistaren ikuspegi sakona islatu duten bi konposatzaileri: David Maslanka eta Jean Absil.

Emanaldi berezi honetan, Bandak Kebyart Saxophone Quartet taldearen lankidetza izango du, gaur egungo eszena musikaleko talde berritzaileenetako bat. Lau musikari talentudun hauek ganbera-musikarekiko pasio amaigabea partekatzen dute, baita musika klasikoa transmititzeko moduari freskotasuna emateko nahia ere. Musikene - Euskal Herriko Goi Mailako Musika Zentroko ikasleen parte-hartzea ere izango da.

Egitarauan Maslankaren Concerto for Saxophone Quartet obra izango da, Bach-en musikatik inspiratutako pieza bat, barrokoa eta egungo hizkuntza musikalak uztartzen dituena. Horrez gain, Traveler interpretatuko da, bizipozari eta bilakaera pertsonalari eskainitako obra, eta baita Rites, Jean Absilek kultur tradizio zaharren espiritualtasuna eta sinbolismoa erritmo bizi eta koloretsuen bidez irudikatzen duen partitura.

Apirilaren 4an, ostirala, Banda Juan Crisóstomo de Arriaga kontserbatoriora itzuliko da "Udaberriaren omenez” lanarekin. Alfred Reed, Aaron Copland, Óscar Navarro eta David Maslankaren lanak zuzenduko ditu Iker Sánchez euskal zuzendari gazteak. Gaur egun, Iker Sánchez BilbaoSinfoniettako zuzendari artistikoa da, musika eremu benetan moldakorrak jorratzeko gai den taldea.