Martxoaren 16an hasiko da Vitoria-Gasteizko Ganbera Zikloaren XIV. edizioa. Aurten ere, proiektu honen bidez, programazio berezia eskainiko da, ekoizpen propioan eta Gasteizko egitura musikalaren sorkuntzan oinarritua.

2025eko denboraldia 8 kontzertuk osatzen dute. Kontzertu horiek XVI. mendetik gaur egun arteko errepertorio musikalean zehar ibilbidea eskainiko dute, musika herrikoian arreta berezia jarrita. Guztiak ‘Jesus Guridi’ Musika Kontserbatorioko areto nagusian izango dira, igandetan, 12:00etan, martxotik urrira bitarte, eta Carlos Seco izango da zuzendari artistikoa.

Hauek izango dira aurtengo kontzertuak:

• Martxoak 16: Dolmen Ensemble (haize-boskotea).
• Apirilak 6: Antzinako musika: The New Old – Javier Blanco, baxua- David Palanca, klabezina.
• Maiatzak 18: ahots-kontzertua: Helene García Barrenetxea, sopranoa – Alaitz Artola, pianoa.
• Maiatzak 25: Euskadiko Musikari Gazteen Lehiaketako sarituen kontzertua.
• Ekainak 8: abesbatzen kontzertua: Leioa Kantika Korala – Basilio Astúlez
• Irailak 7: Victoria Ensemble – Jon Mendiguchía, kontrabaxua (Schubert, “La Trucha” boskotea).
• Irailak 28: Trio Klavier (Estíbaliz Oráa, Patxi Divar, Mentxu Pierrugues).
• Urriak 12: Homenaje a Ravel (150 a.); Víctor Parra, Iván Casado, Alfonso Gómez.

Gainera, zikloak beti oso kontuan izan du belaunaldien arteko erreleboa. Horretarako, bakarlari gazteen emanaldiak programatu izan ditu, eta eskarmentu handiko musikariekin batera taldetan parte-hartzea bultzatu. Horregatik, aurtengo edizioan Guridi Gazteak atala mantendu da; hau da, kontzertu bakoitzaren aurretik Kontserbatorioko ikasleek emanaldi laburra eskainiko dute.

Sarrerak eta abonuak

Abonu (35 euro) eta sarrerak (7 euro) dagoeneko eskuragarri daude www.entradium.com webgunean. Gainera, Kontserbatorioko sarreran, kontzertu bakoitza hasi baino ordubete lehenago arte egongo dira eskuragarri. 30 urtetik beherako ikasleek eta langabetuek doan sartzeko aukera izango dute.