Vitoria-Gasteizko Udaleko Kultura Zerbitzuak Auzo Eszenaren denboraldi berria antolatu du XIV. edizioaren baitan. Otsailaren 16tik maiatzaren 11ra bitarte, gizarte-etxeetako ekitaldi-aretoetan eskainiko dituzte ikuskizunak. Igandetan, 19:00etan, publiko guztientzako (gazteak, haurrak eta helduak) entretenimendua eta era guztietako modalitateak barne hartzen dituen eskaintza anitza izango da ikusgai: antzerkia, dantza, poesia, musika, pintura, zirkua eta mentalismoa.

Izan ere, egitasmoak gizarte-etxeetako ekitaldi-aretoak eta ikuskizunak oholtzara eramateko beharrezko azpiegitura jartzen ditu parte-hartzaileen esku.

2024ko urrian, deialdi publikoa egin zen Gasteizko antzerki- edo artista-talde ez-profesional guztiek beren proposamenak aurkez zitzaten. Deialdira 15 proposamen aurkeztu ziren eta haietako 7 denboraldi honetan (otsaila-maiatza) taularatuko dituzte, eta gainerako 8ak urria-abenduko denboraldian. Denboraldi honetan, honako hauek izango dira eskainiko dituzten lanak:

• Otsailak 16: Anankekek, ‘Libélula’ ikuskizunarekin, poesia, zuzeneko musika, dantza eta pintura uztartuko ditu taulen gainean.
• Otsailak 23: Guralia taldeak txikienentzako obra bat taularatuko du: ‘Delante del espejo’.
• Martxoak 16: Handicap taldeak kontzertua eskainiko du bere azken diskoa aurkezteko. ‘Handicap en vivo’ da kontzertuaren izena.
• Martxoak 23: Azirkartek eta Luz verdek bat egin dute zirku eta antzerki inklusiboko proposamena eskaintzeko. ‘SanArte‘ izenburupean, lan hauek antzeztuko dituzte: ‘¿Encajamos?’ eta ‘Así está la sanidad’.
• Martxoak 30: Tadir arte eszenikoen elkarteak ‘Subliminal’ mentalismoko ikuskizuna ekarriko du Diego Calaviaren eskutik.
• Apirilak 6: Cuatro ojosek mikroantzerkiko hiru lan ekarriko ditu: ‘Más que pipas’, ‘Yo, dictador’ eta ‘Mi madre decía’. Guztiak izenburu honekin elkartu ditu taldeak: ‘Microteatro³’.
• Maiatzak 11: Biziarte kultur elkarteak ‘A cajón serrado’ antzezlana aurkeztuko du.

Sarrerak otsailaren 5etik aurrera erosi ahal izango dira gizarte-etxe eta kirol-instalazio guztietan (frontoietan izan ezik) aurrez aurre edo Internet bidez, emanaldia hasi baino ordubete lehenagora arte. Prezioa 5 edo 7 eurokoa izango da.