Urtarrilaren 29an, asteazkena, 19:00etatik aurrera, "Una vida" aurkeztuko da Bilboko Udalaren Bidebarrieta Kulturgunean. Lana Alejandro Palomasek argitaratu duen azken eleberria da. Elena Sierra idazlearekin batera agertuko da lanari buruz hitz egiteko.
"Una vida" da Alejandro Palomasek "Una madre" eleberriarekin hasi eta "Un perro" eta "Un amor" eleberriekin jarraitu zuen eleberriaren azken zatia. Unibertso narratibo berezia da eta familia batek Amalia protagonistaren ikuspegitik bizi dituen gorabeherak azaltzen dira bertan.
Eleberriek irakurle askoren interesa bereganatu dute, baita kritikariena ere; izan ere, "Un amor" saileko hirugarren lanak Nadal saria lortu zuen 2018an. Eleberri honek egilearen prosa emozional bikaina erakusten jarraitzen du, eta, horren bidez, familiako matriarkaren gaixotasunaren prozesua eta ondorioak kontatzen dizkigu. Arratsalde batean larrialdietara eraman ondoren, infekzio arin bat dirudienak jota, bizitza irauli egingo zaie eta Amaliaren seme-alabek bere gain hartu eta erreakzionatu beharko dute amaren gaitz larriaren aurrean. Eleberriak familia rolak eta denboran zehar, seme-alaba batzuek amarekin duten harremanaren bidez, nola aldatzen diren azaltzen ditu narrazio bizi eta zirraragarriarekin.
Alejandro Palomas idazle katalana da, eta fikziozko idazketa, poesia eta egile garrantzitsuen itzulpena uztartu ditu. Filologia Ingelesean lizentziatu zen Bartzelonako Unibertsitatean eta Poesian masterra egin zuen San Frantziskoko New Collegen. Literatura-itzultzailea, sormenezko idazketa-tailerretako irakaslea, hainbat komunikabidetan kolaboratzailea eta inkomunikazio-arazoen eta familia-harremanen zailtasunen inguruko eleberrien egilea da. "Un hijo" lanak Joaquim Ruyra saria jaso zuen gazteen narratiban 2014an, La Isla de los libros saria hurrengo urtean, eta Haur eta Gazte Literaturako Sari Nazionala 2016an. Besteak beste, "El alma del mundo", "El tiempo que nos une" eta Amalia protagonista duen eleberri sortaren egilea da. Eleberri horiekin familia baten harremanak erretratatzen ditu, eta "Una vida" da tetralogia honekin amaitzen den azken liburua. 2018an, sail horretako hirugarren liburuak, "Un amor" izenekoak, Nadal saria eskuratu zuen.
Elena Sierra (1978) kazetaria da, UPV/EHUn Informazio Zientzietan lizentziatua. 2000. urtean sartu zen El Correo egunkarian, lehenengo Iritzia sekzioan eta aurrerago Kultura eta hainbat gehigarritan. Gaur egun kultura, asia-planak eta gastronomia gaietan kolaboratzailea da. Noizean behin komunikazioan eta jardunaldiak eta ekitaldiak antolatzen lan egiten du, eta ikus-entzunezko eta idatzizko gidoiak egiten ere parte hartu du, beste egile batzuekin lankidetzan.
BIDEBARRIETA KULTURGUNEA Bidebarrietako Liburutegiak kultura zabaltzeko duen gunea da. Bere helburuen artean literatura, ezagutza eta dibulgazio zientifikoa sustatzea dago.
