Irailaren 22tik 24ra bitartean, jaialdi sopeloztar ikonikoak berriro agurtuko du uda, natura, surfa eta kultura uztartuz, ohi bezala inor axolagabe utziko ez duen publiko orori zuzendutako programazio anitzarekin. Berriro ere, musika eskaintza zabala izango da jaialdiaren izendatzaile komunetako bat. Horrela, aurtengo kartela Stay Homas, O ‘Funkillo, Olaia Inziarte, Ezpalak, Ibilbedi, Pasadena, Rüdiger, Lorelei Green eta Cecilia Paynek osatuko dute.
Urtero legez, surfak eta irristatze kirolek leku nabarmena izaten jarraituko dute jaialdi osoan zehar. Horrela, Arriatera-Atxabiribil hondartzan Euskal Surf Zirkuitua, Euskal Herriko Surf Txapelketa eta Euskal Herriko Beteranoen Surf Txapelketa jokatuko dira. Aldi berean, Barinatxe hondartzan III. Open Waveski SKF-BPT eta VI. Kayaksurf SKF-BPT Kopa ospatuko dira.
Horrez gain, skate txapelketa eta txikienentzako sorospen tailerra eta surf ikastaro egokitua izango dira, Peñatxuri Surf Eskolaren eskutik.
Jarduera anitzak
Programazioa osatzeko, jarduera alor anitzeko hainbat jarduera egingo dira, hala nola Sopelako argazki-lehiaketaren hirugarren edizioko erakusketa, kalistenia, parkour eta slackline tailerrak, kometa estatiko eta akrobatikoen erakustaldia edo itsas kantuen errezitaldia.
Halaber, aurten ere ez dira faltako tai chi eta ekialdeko praktiken tailerra, Yoga, haurrentzako tailerrak, hareazko eskulturak egiteko jarduera, hegaluzearen eta sagardoaren dastatze gastronomikoa, ezta Agurea, urpekaria eta itsasoa kaleko antzezlana ere.
Bestalde, edizio berri honek herriko Burdin Hesiaren hondarrak eta Sopelako Eraztun Berdea (Kiribile elkartearen eskutik) ezagutzeko bisita gidatuak ekarriko ditu, baita Meteoritoaren Aztarna izeneko ibilbide geoturistiko gidatua eta Flyscheko itsaslabarretara bisita gidatua ere.
KONTZERTUEN EGITARAUA
- 20:00 Cecilia Payne
- 21:00 Pasadena
- 22:00 Olaia Inziarte
- 23:15 O´Funkillo
- 00:45 Amaiera
- 20:00 Lorelei Green
- 21:00 Rüdiger
- 22:00 Ibil Bedi
- 23:15 Ezpalak
- 00:30 Stay Homas
- 02:00 Amaiera
